Shoqata e Prindërve të viktimave në diskotekën “Puls”- Koçani i ka bërë thirrje kryeministrit Hristijan Mickoski të publikojë videon e plotë të takimit të tyre në qeveri më 7 korrik. Në reagimin e tyre ndaj deklaratës së djeshme të qeverisë, ata thonë se e gjithë biseda është regjistruar nga Mickoski, transmeton Portalb.mk.
“Nëse vërtet i qëndroni besnik fjalëve tuaja dhe besoni në transparencë dhe ndershmëri, ju nxisim të publikoni lirisht videon e plotë të atij takimi, në mënyrë që publiku të mund ta shohë vetë të vërtetën”, thuhet në reagimin e shoqatës.
Të premten, prindërit akuzuan kryeministrin Hristijan Mickoski se i kishte fyer thellë në mbledhjen e qeverisë të mbajtur më 7 korrik.
Sipas tyre, kur po shqyrtonte kërkesën për një ndihmë financiare një herëshe për dhimbje emocionale, kryeministri u tha atyre: “Kjo kërkesë është e njëjtë me propozimin e LSDM-së, vetëm se nuk i vendosët një çmim. Vendosni një çmim për fëmijët tuaj.”
Qeveria më pas u përgjigj se këto akuza nga prindërit nuk ishin të vërteta dhe tha se kishte pasur një shpërqendrim dhe abuzim të qëllimshëm të fatit tragjik.
Prindërite viktimave edhe dje kanë marshuar në Koçani- marshi i dhimbjes dhe luftës për drejtësi organizohet nga shoqata e qytetarëve “16 mars 2025 Koçan”.
Ky ishte marshi i 15-të, i njohur edhe si marshi për engjëjt.
Aktakuza për aksidentin fatal që ndodhi më 16 mars në diskotekën “Puls” të Koçanit është më shumë sesa thjesht një dokument juridik. Është një kronologji e mosfunksionimit të një sistemi të tërë, i cili rezultoi me 62 vdekje dhe mbi 220 të plagosur. Midis tyre ishin edhe 20 fëmijë.
Zjarri në Koçan shpërtheu natën e 15-16 marsit, duke rezultuar me 62 viktima dhe duke plagosur pothuajse 200 të tjerë. Prokuroria ka ngritur akuza kundër 34 personave të cilët, nëpërmjet veprimeve ose mosveprimeve të tyre brenda sistemit, shkaktuan katastrofën. Aktakuza përfshin gjithashtu tre kompanitë e pronarit të diskotekës, i cili është i pandehuri kryesor.
