Investigimi i të dhënave publike dhe raporteve financiare zbulon një profil të dyfishtë të Mensur Alitit, i cili shfaqet njëkohësisht në disa role të ndjeshme për opinionin publik.
Sipas faqes zyrtare të Agjencisë së Filmit të Maqedonisë së Veriut, Aliti është i emëruar si anëtar i Bordit drejtues, organ që ka në dorë menaxhimin e politikave shtetërore në fushën e filmit. Ky funksion shtetëror e vendos atë në një pozitë vendimmarrëse, e cila kërkon standarde të larta integriteti dhe pavarësie.
Megjithatë, të dhënat e prokurimeve publike nxjerrin në pah një tjetër realitet. Kompania “I-Point Marketing” nga Tetova, ku Aliti figuron si bashkëpronar, ka përfituar disa tenderë të rëndësishëm nga Komuna e Tetovës, e udhëhequr nga Bilall Kasami. Vetëm gjatë viteve 2023–2024 kjo kompani ka arkëtuar dhjetëra mijëra euro nga kontrata për shërbime promovuese, brendim të qytetit, shtypje materialesh dhe dhënie me qira të pajisjeve për evente publike.
Statistikat financiare flasin vetë: nga një kompani me të ardhura modeste në vitin 2022, “I-Point Marketing” u kthye në një përfitues të madh të buxhetit komunal në vetëm dy vite. Ironikisht, fitimi i raportuar ka qenë simbolik, duke lënë hapësirë për dyshime mbi mënyrën e menaxhimit të fondeve.
Përtej rolit të tij si funksionar shtetëror dhe biznesmen fitues tenderësh, Aliti shfaqet edhe në një dimension tjetër: si donator politik. Raportet zyrtare tregojnë se në vitin 2023 ai ka dhënë 3.000 euro për Lëvizjen BESA, parti në krye të së cilës qëndron Bilall Kasami, i njëjti që nënshkruan kontratat fituese të kompanisë së tij në Komunën e Tetovës.
Ky treshe funksionesh, zyrtar shtetëror, përfitues tenderësh dhe donator partiak, ngre dyshime të rënda për konflikt interesi dhe përdorim të pushtetit publik për interesa të ngushta partiake e personale.
Në një shtet ku transparenca shpesh mbetet vetëm në letër, rasti i Mensur Alitit është shembull se si pushteti, biznesi dhe politika ndërthuren në kurriz të interesit qytetar. Pyetja që lind është e qartë: a do të reagojnë institucionet e drejtësisë dhe antikorrupsionit, apo kjo do të mbetet një nga dhjetëra skemat që kalojnë pa asnjë pasojë?
